EL TESTAMENT di Ada Lauzi
L’è inutil pensagh nò,
l’è inutil fà scongiur,
perché quell “tal moment”
el riva de sicur
senza guardagh in faccia
a sciori o poarett,
cont on regolament
bell ciar, senza sghimbiett.
Minga che gh’abbia voeuja
(‘ntendemes) de morì,
ma catti l’occasion
che gh’abbien de sentì
quei che me voeuren ben,
i amis, i conoscent,
e poeu ne tegnan cunt,
squand che sarà el moment:
me importarà nagott
de “ciaccer” o de fior,
ma per el mè Milan,
on ultim att d’amor;
voeuri sentì on bel coro
in lengua Meneghina,
cantà su la mia foppa
“…mia bella Madonina…”
E mì … sora ’na stella,
ninada in del seren,
ripetarò in eterno
“Milan, te voeuri ben!”
