LA "PRIMA" DEL FALSTAFF di Corradino Cima
De Oper, - dai quindes ann vegnend adèss-
n’hoo sentii cert pussee d’ona centènna
Trà vègg e noeuv, sia ch’abbien faa succeèss,
o che abbien tiraa el fiaa* ona sira appènna.
Ma sora a tucc, mì ve ciammi el permèss,
-de già che me regordi e sont in vènna-
De rievocà la prima de’l Falstaff
sperand de tirà drizz e pèrd nò i staff*.
L’è staa precisament al noeuv febbràr
milla e vottcent-novantatii. Sull fior
di desnoeuv ann, compagn d’on paracâr*,
son lì a fà porta* fina dai des or.
Se passa el temp, intanta che l’è ciâr,
cont i micchètt ripiènn e col discor.
La “cova*” de’l lobbion* l’è spèssa e dritta
De rivà squasi a Santa Margherità.
……………………………………..
Se discutt intrattanta del librett
per lodall, se capiss, o criticall.
Chi fa el nomm d’on artista predilett
de mett su l’altarin per incensall;
chi a on alter el ghe voeur trovà el difett
d’on do diesis ch’è mai riessii a broncall;
chi infin, sbirciaa on donnin, le ten de mira,
per fagh de cavalier tutta la sira.
…………………………………………
