LA NOTT DE NATAL di Aldo Peduzzi
La nott l’è fonda,
tas el vent, tas l’onda,
tas l’usèll in su la fronda.
L’aria l’è pièna de bon odor,
de basitt, de carèzz e de fior,
l’è dolza, la parla d’amor.
Brillen i stèi,
i pussée brutt e i pussée bèi,
se guarden, se parlen, hin tutt sorèi…
A sentì st’atmosfera inscì beada,
brusèmm i rancor in d’ona fiammada;
strengemes la man... la pas l’è fada.
E visin al foeugh ch’el fa la scighèra,
parlemm pù né de lott, né de guèrra;
ma via, vorèmes ben in sù sta tèrra.
Sentii… sonen la piva i bon pastor.
Svoiemm el coeur d’ogni dolor,
stemm in pas fradèi, gh’è nassuu ’l Signor.
