SCARPETT DE BALL
In fond a on vecc guarneri i hoo rivist
che curiosaven foeura d'on sacchett:
sbiavii, lisaa in la ponta, quasi trist
e i hoo ciappaa in man, i hoo tegnuu strett...
Subet la fantasia matricolada
l'ha soffiaa su la pòlver di regord...
Ona ribalta a fior illuminada
e da on orchestra, dolz, i primm accord...
"...ve regordee? Leggera 'me on piumin,
poggiaa sui rizz el gran cappell de paja
francaa col naster sotta el barbozzin...
l'era el debutt nel quader "La fioraia".
Poeu l'è cressuda... s'è slongaa el "tutù"
bianchezza e pizz la morbida sottana...
"Romantica"... "El bel Danubio blu..."
volaven quij pescitt de porcellana!...
Croden i sogn baloss del temp che va,
tas l'armonia, se pizza el lampadari
sora on palch scenich voeuj, doe la realtà
col brutt e 'l bell, la mas'cia i sò scenari.
Quìettes, benedetta fantasia!
Lassa 'sti bej regord sora on bombas
Mettegh vesin on fior de nostalgia...
On coeur de mama... e dò scarpett de ras
Medaglia d'Oro - Premio "Sant'Ambroeus" 1979
