L'ASIN E 'L CAVALL
On dì se incontren lì, scherz del destin,
on bell cavall de sella e on pòr asnin,
criniera al vento, luster el mantell
l'asnin le guarda e 'l risc'cia "Ciao fradell!"
"Fradell...?! A mì...?! Rimires in del specc,
contempla tutt l'andà, compres i orecc"
Forza de l'abitudin, l'asinell,
el sbassa el coo e 'l ghe dis "Te see gran bell!"
"E poeu di mè parent parla la storia,
tì te gh'hee nò né scienza né memoria!
Su i camp de guerra, de competizion,
in di complott d'amor, in di evasion,
semper appress a mì l'òmm l'ha vinciuu"
Allora el somarell l'ha risponduu:
"Per tutt quell che t'hee dii, te doo reson,
te see 'na creatura d'eccezion,
però el Padron del mond l'è staa content
de fass portà de vun di mè parent,
e in de la Grotta a confortà el Bambin,
gh'era minga on cavall... ma on boeu e 'n'asinin!"
