EL ME' ANGIOL CUSTOD (1877)
Quand tanti ann fa se usava in di familli
"fà parlà el tavolin"* gh'hoo anmò present
che in del ciamagh a on "spirit" di consilli,
el m'ha ditt che podeva vèss content,
perché el mè Angiol Custôd, omm de pontilli,
che me stava taccaa, semper present,
l'era el Nonno Felipp*, galantomon,
ch'era staa in Russia con Napoleon.
L'è on fatt che 'l primm ajutt mì ghe l'hoo avuu
quand de bagaj hoo mandaa giò on sesin*.
S'era già tutt paonazz. S'era perduu.
Senti a strappamm de colp dal sgabellin,
ciappam i pè, scorlimm, piccamm el cuu:
on did in gola, on vèrs, on bell rodin...
foeura i duu ghèj... E innanz che me stremissa,
famm bèv e pessegà a famm fà la pissa.
Và ben che a tutt' sti robb, materialment
ha provveduu la Bice, poera stèlla,
ma chi ha poduu ispiralla in quel moment,
cambiagh la tenerèzza de sorèlla
in eroismo s'cett, al cent per cent,
se non l'Angiol Custòd, che pròppi in quèlla
el gh'ha trasfûs quel spirit de leon,
dègn d'on soldaa ch'è staa cont Napoleon?...
Mì speri in l'"al di là" e ve disi s'cett
che, oltre al sentì rispètt, riconoscenza
per el mè Nonno, on bòtt tiraa i calzètt*
faroo l'istess de Lù, e de conseguenza
mì ghe staroo taccaa a qui càr follètt
de mè neodìtt, che, a dill in confidenza,
Silvano e Ciacia hinn tàl ona delizia
de delenguamm in gius de regolizia.
