REGORD DE... PATATI
Te seret lì inmezz alla strada.
borlada* foeura da la borsa de la spesa,
d'ona quij donna che tornava dal mercàa;
al primm vedett t'avaria tiràa ona pesciada*,
per fatt totolàa da la discesa
del bastion; ma on regord m'ha fermàa.
Sì! A fermamm l'è stada la guèra;
el regord del camp de concentrament,
col miràcc* de podèe mangiàa a sazietà!
Cont amor t'ho cattada su de tèra,
t'ho carezzàa e cont on'onza* de sentiment,
come ona reliquia t'ho portada a càa!!
Regord che de magon* me strozzaven*!!
Quand s'eri presonée ( desdott'ann gavevi ),
se in mezz al ruff* o al letamm,
trovavi ona quij sorella Kartoffeln
senza langoeur* on boccon fasevi:
la serviva 'nca lee a placàa la famm!
