ACQUERELL DE PRIMAVERA
Vardavi on fioeu corr desperàa,
fiàa gross e pien de magon*,
là nel pràa, adrée 'l soo aquilon,
ch'el ref* el ghe s'era s'ceppàa!
Alter fioeu in riva 'l laghètt,
scusciàa a pel d'acqua a speggiassa,
a pocciàa* i mann, tiràa sass,
o fa bordell* cont i barchètt!
Sui viaij de gera* i tosanètt,
ghe fan la nenia ai soo pigott*;
fan finta de dagh el biscott,
ij cunen* d'istint de mamètt!
Mi goo nel coeur tanta emozion;
vardi senza famm toeu via*;
divers de l'infanzia mia...
De lagrem corr on quij gotton!
Ormai s'è visin a sera;
in là ghè on roccol* de donètt;
sgugien e poncien sui calzett!
L'è tornada primavera!
