NOSTALGIA DE MILAN
Stasera sont in vena de fa el sentimental
la nott l'è inscì serena ma mì me senti mal!
Te scrivi cara mama, sont stuff de restà chì:
el mè Milan el me ciama visin a tì!
O mama mia mì sont lontan ,
ma g'hoo la nostalgia del mè Milan;
mì voraria turnà doman:
t'el giuri, curaria col coeur in man!
Vedè la Madonina, sentì el mè bel dialett,
svègliass ona mattina in del mè lett!
O mama mia, inscì lontan,
t'el giuri, piangiaria pur de vess a Milan!
La par 'na stupidada se pensi ai mè bastion,
e foo 'na sifolada per cascià giò el magon!
E quand ven giò la sira ricòrdi i bei tosann,
rivedi la ringhera di mè vint'ann!
O mama mia mì sont lontan,
ma g'hoo la nostalgia del mè Milan,
mì voraria turnà doman:
t'el giuri, curaria col coeur in man!
Vedè la Madonina, sentì el mè bel dialett,
svègliass ona mattina in del mè lett!
O mama mia, inscì lontan,
t'el giuri, piangiaria pur de vess a Milan!
