CIAO... VECC TROMBEE
Denanz del vecc porton paraa de scur
chi va, chi ven, chi spetta
e cicciara sott vos...
On carr con tanti fior, el pret, la Cros
e via per l'ultim viagg .
I amis in sul canton
fann roccol al basell de l'osteria,
el guarden andà via...
Ciao vecc trombee! Su l'uss del ripostili,
taccada a on ciod la muda col berett;
al scur, in d'on canton
el tò borson de pell on poo consciaa
el se stravacca su on mucc de catanaj
stroppai e ciav ingles...
... e scarpasc che se guarda in tra de lor...
poca gloria sul rest del tò sudor...
Ciao vecc trombee...
innamoraa di lus de la mattina,
di serenad, del sô, de la scighera,
di ricamm de la brina,
di stell de giazz sui veder del soree...
vòltes indree: doman l'è primavera
e sott al persegh tutt vestii de rosa
on passer in surbuj
el cercarà i freguj de pan frances
che borlaven de sott al tò scartoss,
le sa minga el baloss
che tì per semper t'hee cambiaa paes...
Nissun ghe l'ha cuntada al tò sorian
che 'l mogna, el mogna rent a l'uss de cà,
(el sò tondin l'è voeuj... in doe l'è andaa?)
Nissun gh'ha ditt che te see andaa lontan...
Nott senza luna, biotta de paur
scur in la cort ma in alt, sui ripianitt,
on bisbili... de vos... se fa el sò nomm:
"... galantomm cont i amis... pocch ma sicur...
"... compens ai sò vizzi?...
"... con la povera gent moneda nient..."
" se proppi proppi, on caliz de quel bon...
" se sa, anca on quai vizzi,
" chi no ghe n'ha a stò mond?"
L'ultim ciarin che 'l par 'na lusiroeula
el giuga a ciar e scur: l'è 'l mocc impizz
del Peder che l'è dur a ciappà sogn.
Foeura del sò abbain
sul cadreghin de paja
el rumèga penser che sann de fumm.
"... jer el bagaj l'è andaa sotta a la naja;
" incoeu on amis partii per el foppon
" e doman? ... Sa el Signor... on'altra Cros..."
" Peder!... (ghe dann la vos)... ven a dorm'!"
" Ma sìche sarà mej..."
Sul ripianin desert
come on gran coeur che batt
picchen i gott del lavandin che perd...
