AH CRISTO CHE MORTALITA'
Ah crist cristo che mortalitaa!
Quanti scioroni ch'è sballaa in sti dì;
pover Milan, se la va innanz inscì,
prest prest te restet senza nobiltaa.
In sti cinqu mes, se no me sont fallaa,
hin desdott che ha faa mostra de morì,
l'imperatriz, el duca Melz del grì,
el Somaja, el Cusan e l'Arconaa:
la Litta Modignana, el Delfiron,
la Spinola, el Sormann, el cont Caprara
Bazzetta, Archint, Rosales, Martignon;
la Carcassoeula, se no l'hoo cuntada,
el Lecch, el Carchen e poeu quella cara
cagnetta de don Peder Lattuada.
