INFERNO CANTO III
Traduzione dall'Inferno di Dante
Canto III di Carlo Porta
Dessora a ona portascia che someja
a quella gran sgavasgia de dragon
che metten foeura al convitaa de preja,
gh'era scritt sti paroll cont el carbon:
Porta che menna all'eterna boreja,
al paes di rottoeuri e di magon:
gent che passee no lusinghev on corna
de trovagh el calessi de ritorna.
S'ciavo sur mascher! Chì ghe va ghe resta:
son staa faa per castigh de la malizia
di angior che han creduu de alzà la cresta
e di quij che con lor strengen missizia.
Dio el m'ha faa per vess eterna, e questa
l'è la sentenza de la soa giustizia,
e a quij ch'è denter poeù ghe la perdonna
se la ciamen giustizia bozzaronna.
