SOLITA STOCCATA DI AKMETT
Alla testa de tutt el battajon
di soeu besogn, che hin fior de petulant,
el se presenta Akmett coj duu ajutant,
a cavall di chignoeu di soeu colzon.
E chì el protesta a tucc che i sò intenzion
hin quij de tucc i roj belligerant,
ciovè de paccià e bev e stà d'incant
ai spall (con soa licenza) de mincion.
Donch se vorii fà a moeud d'on omm de pas
el mej de tutt l'è rendes addirittura
e dagh de bon e bon a quell che ghe pias.
Se de nò col stà dur e repettà
contra on stoccadoron de sta bravura
ve toccarà poeù el colp de fav restà.
