LA GUERRA D PRET
Canti la guerra santa, i breviari,
i piatt, i micch, i peccher, i peston.
i calott, i barett, ch'è sgoraa in ari
e hann gibollaa la cerega e el melon
a vintiquatter pret che in cappa e in vesta
celebraven a tavola ona festa.
Oh gran pader di vers e della bissa,
promotor di baruff e di legrij,
tì che sti pret te gh'ee scoldaa la pissa,
scoldem anch mì, te preghi, i scinivij,
in manera che possa famm onor
con di rimm degn de mì, de tì, de lor!
El dì de sant Lorenz, a on sit de foeura
pocch lontan de Milan se fa on feston
in onor del gran sant cott in broeusoeura;
i fustusc della gesa hin confession,
panegiregh, campan, mess, sinfonia,
e ciccolatt e acqua in secrestia.
